Hiri amargina bezala ezaguna, eskualdeko herri nagusia da Eibar, biztanlegoaren gehiengoa han bizi baita. Industria-tradizio handiko udalerri honetan, pixkanaka hirugarren sektorea suspertzen ari da, inguruko enpresei eta pertsonei zerbitzu mordoxka eskainiz.

Ondare Industriala
Eibar Gipuzkoako industria garapenaren gune garrantzitsuenetako bat izan da. Mende luzez, armagintza izan zen hango jarduera nagusia, eta askotariko produktu eta enpresak eratorri dira industria horretatik. Eskualdearen industria-dibertsifikazioa armagintzan eskuratutako ezagutzei eta trebetasunei zor zaie. Era berean, funtsezkoa izan da Debabarreneko biztanleen ekintzaile-izaera. Ezagutu zergatik deitu ohi zaion Eibarri hiri armagina Armagintzaren Museoan.

Artea, kirola eta askoz gehiago
Eibar, denbora aurrera joan ahala, hazkunde handia eman duen herria da. Bertako ondare arkitektonikoak bere gain hartzen ditu San Andres Eliza edo Unzuetako Dorre-Etxea, “Markeskua”, Aldatze Jauregia edota udaletxeko eraikina bera.

Halaber, kulturaren eta kirolaren inguruko eskaintzen duen jarduera-sorta zabalagatik nabarmentzen da (esaterko, oso gomendagarriak dire SD Eibarren instalazio berriak).

Portalea Kultur Etxeak erakusketa eta kultur ekimen ugari hartzen ditu urte osoan zehar, baita Coliseo Antzokiak ere. Nabarmentzekoak dira, inondik inora, Antzerki Jardunaldiak, Estatu mailan urtetik urtera are eta entzutetsuagoak direnak. 

Eibarko Arrate Amaren Santutegia, eibartar eta bailarako biztanle guztientzat leku guztiz berezia da. Arrateko Amari buruzko lehengo berriak XIII. mendekoak dira.

Arraten kokatzen da Gerra Zibileko Eibarko Frontearen Interpretazio Zentroa, urte osoan zehar bisita daitekeena.