Debabarrena Turismok bere komunikazio estrategia gaurkotasunera egokitu eta eskualdera etortzen diren turistentzat informazioa modu egoki, interaktibo eta erosoenean eskaintzeko bere webgunea berritu du. Gaur egin da webgunearen aurkezpena, Deban eta bertan izan dira Gipuzkoako Foru Aldundiko turismo departamentuko ordezkariak, Debako Alkatea eta udal ordezkariak, Debegesako lantaldea eta eskualdeko turismo arloko eragileak.

“Denborak aurrera egin ahala, helmuga turistikoez jarduten duten informazio iturriak kontsultatzeko ohiturak aldatu egin dira eta horregatik beharrezkotzat jo dugu Debabarrena eskualdearen informazio turistikoa modu erakargarriagoan eskaintzeko gure euskarri digital printzipala eguneratzea” azaldu du Aitziber Cortazarrek, Debegesako Turismo eta Garapen Jasangarriko departamenduko arduradunak. Estekak lehengo berdina izaten jarraitzen du, debabarrenaturismo.com, hain zuzen ere. Beraz, eskualdeko xehetasunak jakin, bisita planifikatu edo Debabarrena eskualdeari buruzko informazioa jaso nahi duen edonork jo dezake bertara.

Han, orain arteko informazioa aurki daiteke, baina modu berritzaile eta erakargarriago batean: eskualdeko ostatuak, jatetxeak, ekitaldi gastronomikoak, Geoparkea, hondartzak eta igerileku naturalak, ibilbideak, etab. Webgune berria diseinatzerakoan, nabigazio intuitiboa lehenetsi da, bisitariek eskura izan dezaten, klik bakar batekin, behar duten informazio guztia, eskualdeko txoko eta jarduera esanguratsuenak nabarmenduz. Gainera, orrialdea erabat moldagarria da gailu mugikorretara eta tabletetara, eta esperientzia erosoa eta guztiontzat eskuragarri egongo dela bermatuko da.